Ringsum vo Berje ingefaßt,
Nur nach dem Goldne Grund zu offe,
Liegt‘ Dörfche mei, mei lieblich Esch,
Das ich ins Herz hab ingeschlosse.
Uff ahner Seit‘ de Wingertsberg
Mit goldne Ährn, mit Korn un Waas,
Es Emstal un de Dinkelstaa
Mit mancher schöne Tanneschnaas.
Die Mohrnheck un des Harbachtal
Mit seine Wiese tief im Wald,
Ka schöner Plätzche find ich nit,
Es werd gelobt vo jung un alt.
Dorchs Eschtal geht’s zum weise Staa,
Wo dies Johr unser Brochfeld lieht,
Die Kreuzheck mit Kartoffele,
Un Äcker, wo de Klee jetzt blüht.
Des Marschbachtal, de alte Berg,
De Gilges- un de Lippegrawe,
De Münzeberg un hinnerm Hahn,
Des is de Schluss vom goldne Raame.
Do mitte drinn, uff rote Dächer,
De Kerchtorm mit sei’m schöh‘ Geleut,
Guckt friedlich uffs geschäftige Treiwe,
Die schönste Heimat, weit un breit.
Quelle: Karl Byron in "Heimatjahrbuch des Untertaunuskreises 1950"